andro oda so šaj avelas predžiďiľom ezera berša
andro oda so šaj avelas predžiďiľom ezera lumakere maripena
andro oda so šaj avelas predžiďiľom šel meripena,
milijona kilometra andre lumakeri povši, andro jiv
prerovkerďom raťa butedera, kerďom na čak jekh nalačhibena,
u kerďom žaja olenge saven nek barederes kamav, agacenge te la čarake
bibachtaľipen thovav.
Akana,
akana rovav me,
u rozrovkerava taj lumakero paňi,
tasava savoro sostar pes čak chudav.
Chudav le levos vasteha u zasovel olestar
paše tute numa,
som bijo lavakero u nadžanav sar dural the džal,
čorava o zejgos,
dava tuke les.
Bičhava o kham kaj čak Tut te taťarel,
čak vaš Tuke bičhavav le anďelkonen,
kaj pre Tire sunora te viďazinen, Tire dživipnaskere kamibena
le devles marav tele andro lačho maripen, pro khoča les me rakinav
vašoda kaj sal ajsi šukarori, asavibnaha zathoďi
u le phučibnaha
soske Tut kajsa kerďa,
u soske avka dur khatar mande,
u soske čak akana…
kaj sas či akada ideos ?
U soske domukľa kaj kajso te kerav me binos, diliňipena
Šukaripen palo drabaripen kerav u les me pre thuvaľi čerinav
u Tiri biza andro duralipen bičhavav,
čhivkerav Tut tele gadenca andro asaviben urav,
andro žužipen jilestar
andro nek šukareder viragi,
nachudav me Tire vuštora, jakhora
u ča lokore hangoha pijav Tira voďatar,
rozmukav mire bala,
u lenca apsora savore Tire zaphandav,
čak vašoda kaj the dikhes miro bizarno phiraviben
viragi,
sar Tuke phundraven tire jakhora,
andro khamoro,
savi vaš peskeri tu peske la ľijal ….
Veša, bare veša viďazinen pre savoro,
čilagi u the sa oda so hi averoro ke Tire čanga perel,
asvenca me savore Tire dukhavibnaskere avri sasťara,
vastenca asvora savore Tire khosava,
šitejťipnaha chudava Tire vuštora
u jileha me merava,
vaš oda kaj čak duralur me Tire balora andre balvajori dikhvava, jakhora,
Tiro phiriben pre ulica,
pašľos andro zejgocis,
Me tut merkinav, dikhav Tiro levegos
džanav Tiro tirkišagos,
Tire šukar anguštora, andre miri voďi, mire jakhora,
save,
save avri kamibnaha sasťarďal…
