Saraňakere pal oda so tut užarel. The sajinel pre lende džvipnaha, khataro thana
kaj varekana čujolas paňi, bare phuvakere paňa, ko than kaj hi čak bari povši u ňiso
aver, odoj kaj baron šukar viragi, ko kiko zejgos. Odoj kaj taťibnastar khelel kamiben,
zachudel tut pharipno jilestar šilaľipen u čak dukhaviben anel.
Imar nabirinav. Imar mušinav me o sarňa the rakinav tele. The bešel mušinav pro
bar u the užarel pro oda so manca dural avela. Mušinav the mukel akadi luma, pre savi
charno ideos džiďom u thoďom duma. Mušinav the del agorutno lav mire baratenge
u the džal pro zejgošno averipen. So mange odoj te lel peha? Ko man lidžela pre akada
drom? Ňikana na somas ajso korkoro sar akana. Kamav mejk pro agor akalske savoreske
the dikhel o zejgos. Kamav the dikhel o kham. Mejk jekhfar. Savoreske akaleske
so dživas the del agorutno lav devlikano, u the džal andro kaľipen phuvakero.
„Raje Zvara, čak pašťon! Den tumenge smirom, našťi tu men varekaj džan! “
„Čak varekeci phiribena pro mire pindrore, šunen man, sasťipnaskeri pheňori. Kamav
čak ke blakica the džal. Kaj mejk the dikhav čačikano dživipen, zejňi čar, thaj kotoror
zejgos.”
„Oda našťi, raje Zvara. Džanen mišto kaj o primaris tumenge imar phenďa kaj našťi
ušen upre.”
Phares pes mange džala khatar kadi luma, the narakina agorutne duj lavora le
zejgoha the le khameha. Kana odoj džan, imar feder pes tumenge džal the paš
tumende ačhel vareko ke tumende pašutno manuš. Andre sikľarďi manca phirelas miri
dajori. Čumidelas man pro čekat u phenelas mange: „Av lačho u šun!“ Pro slugaďipen
manca džalas miri piraňi lavenca: „Nadara oda predžala sar paňi u gindin tu pre
mande sako raťi“ Kana diňom solacharipen mira romňake paš mande džalas miro dat
the miri daj. Andre špitaľa man odliginďa miro čhavo. Ko mange podela vast kana imar
dža pro agorutno dživipnaskero drom? Ko man čumidela pro čekat? Ko mange phenela
varekeci šukar, tate kamibnaskere lavora u nabisterela pre mande, kana zaphandla
mire jakhora? Ko mange phenela kaj the nadarav meripnastar. Vaj merava bijo lav
u korkoro?
U andre akada ideos pes sikaďa maškaro vudar o anďelkocis. Sas les somnakune
bala u urdo sas andro parne gada.
„Lačho ďives raje Zvara. Phende mange kaj akadaj pašľon. Kamav tumen me the dikhel.”
„Av pašeder ke mande, anďelkona miro. Užaravas tut me. Me paťavas kaj aveha. Sako
jekh ďives si vaš mande šukar the lačho. Imar čak vašoda kaj hino u kaj les šaj predživav.”
Romňi jileha the mujeha sar le anďelkoscis peske bešľa pro agor le thaneske ko murš
savo imar ačhel pro meripen.
„Den goďi pre mande? Varekana ke amende tumen phirkerenas. Mire dateha sanas bare
barati.”
„Čačo hoj dav goďi. Užarav me pre varekaste savo hin sar tu. O zejgos tut mange
bhičaďa. Nadžanes ňi savo som bachtalo pal akada kaj avľal tu ke mande.”
„Nadhukal tumen vareso, san mištes? “
„Dhukalas man, no imar nadhukal. Nadžanav imar so hi oda dhukhavipen, ňi žaľa, vaj
varesavo pharipen. Pal jekh mange čak giľavel miro jilo, kamav zejgos mejk jekhvar the
dhikel. Kadarik, khatare amari phuv. Šegitineha mange u lidžeha man ke blakica? “
E romňi – anďelkocis les chudľa vastestar.
„Raje Zvara, imar tumenge me phenďom kaj našťi ušen andralo divaňis,” pal pale
rakinďa kala lava pre leste e sasťipnaskeri pheňori.
„Dhikes anďelkocis. Imar čak avka me ačhavava visardo mujeha the dumeha ko zejgos.
Kavka man lidžena khatre akadi parňi špitaľakeri soba ando kalo mochto.”
Kikinďa leske o vast, kaj leskere taťibnaha the kerel šukariben pro leskere šilale gindura.
„Phenava tumenge savo hino ada ďives, the o zejgos…., “
Gejľa ke blaka u čhiďa peskere jakha upre pro zejgos.
„Si ada ďives šukar ďives. O zejgos hi kikoro u taťarel les o khamoro. Ajso hino žužoro.”
„Mušinel oda te avel but šukar! Te miri voďi hi akana kikori, žužori,- Ňisavo vareso so
mange pašĺolas palo o berša pro miro jilo. Savoro imar rozphurďa e balvaj. U pro zejgocis
mira voďatara peskero mujoro o khamoro sikaďa. Oda tu, anďelkocis miro, tu avĺal
u savoro kalo džungalipen mandar avri čhiďal. “
Muršeskero muj zalabija šukaribnastar. Pro deš perci zaphanďa peskere jakhora u po
lovkes zaasanďa. Joj peske pal pale bešĺa ko than.
„Gindinen pro vareso šukar?” He. „Gindinav pro ideos, kana ke tumende phirkeras.
Leperav pro baratipneskere bešibena ke tumende u the šukar vakeribena save
khetane rakinahas. Tire dadeha te la dajaha samas but bare barati.”
Pal akada pes so duj džane chudle pro gindipen sar varekana sas. Nasvalo murš
la šukar romňaha so dikhelas avri sar anďelkocis bešenas jekhetane pro cikno thanoro
pre jek trastuno špitalakero than pro onkologicko – rakovinakero sasťipnaskero
khotor savo hi andre špitaja. Vakerenas khetane pal peskere jekhetaneskere barata.
Gule lava khelenas šukar asavibnaha numa te asvenca. Cikno asaviben thaj asva pes
visarenas bi lavengerenca andre akadi špitajakeri soba.
„Bud me daravas pal oda kaj o anďelkoci nane, “ phenďa o murš. „Sas man daravipen
kaj ke mande na avela ňisavo anďelkocis, kaj ke miro than naavela ňiko, kaj ačhava
korkoro. But me daravas kaj merava korkoro. Akana som imar smirom. “
Pal pale zaphanďa peskere jakha u ačhiľa bijo lavoro.
E romňi phundraďa e blaka, kaj andre soba the avel lačho velegos khataro ruži save
barenas tele blaka. Pro zejgos dikhľa the sajinel padaki le manušenca.
„Raje Zvera, soven? “phučľa lovkes.
„Nasovav, anďelkocina miro.”
„Te me dikhav le anďelkocen. Peren tele khataro zejgos.”
O murš phundraďa peskere jakha u čhiďa len ke blaka.
„So oda me phenav, oda si manuša, o porašutisti. Phares mange kaj len, našťi pre
peskere jakhora tumen dhiken. Hi len bare šukar barvenca padaki. Sajinel pro zejgos
sar kaj len the avenas barevne sarňa.”
„Save hine o la sarňa: Vaker, so dhikes?”
„Varesave padaki hine but khelde savore barvenca. Ajse hine sar lepetki. Aver hine
kike, pinkašne baldachinoskere. Hi oda ajso baro šukariben pro jakha. O manuša pes
sikľarde the sajinel. Kerde peske sarňa, kaj the džanen sar savo baro šukariben hi oda
kana pes sajinel zejgoha, sar čirikle. “
„Džanav mange akada so vakeres the thovel ko jilo. Džanav ke leste the rakinel oda
dikhiben pal akala sarňa u te oda šukariben avri cindo le daravipnaha pal akada
učiben pro zejgos kana šaj peres tele. Perav andro baro našaviben. Miro deštos si but,
but lokoro. Som ajso biphandlo lestar. Ke mande ačhel čak akada sajipen, šunav sar
sajinen anďelkoskere sarňa. “
„Raje Zvara, vareso tumenge anava. Užaren, imar som adaj.”
„Ča, dža anďelkocina miro. Užarava tut me akadaj.”
„Nadžava dur. Miri soba si čak upre. “
Pregejne varekeci deš perci u e romňi pal pale bešelas pro muršeskero than savo
sas bares nasvalo. Akada cikno užaripen leske perďa pro baripen u avka zasuťa
vašoda kaj nabirinelas. E romňi leske lija o vast andre peskeri burňik. Joj phundraďa
o jakha.
„Akadaj sal anďelkocina miro?”
-„Akana sam akadaj dujdžanore. Dikhen, so tumenge anďom.”
Thoďa leske andre leskeri burňik čitrimen figurica anďelkocistar.
„Hi ajso šukaroro. Sar džido. Sar tu. Lava les peha pro drom.”
„Me les tumenge kamav the del jilestar. Rajzojinďa les miro pirano. Te joj avela lošalo,
kana leske phenava kaske diňonm leskero cikno šukariben savo korkoro joj kerďa
peskere vastneca.”
Jakha muršeske savo imar merelas pes pal pale zaphandle u leskero manušakero
levegos sas imar but ciknoro taj lokoro pro agor. E romňi ušťila upre u gejľa ko vudar.
Mejk jekhfar dikhla pre leste, sar čak avka pašľol nabirindo pro than, parneder sar
parno u šuko igen sas, bijo jekh baloro pro šero. Andrale pofaj leske pes šaj genelas oda
so peske gindinelas, oda kaj imar pes mukela bijo kham, kaj imar šaj džal pro drom
kale thaneha. Na sas korkoro, andre burňik leske bešelas rajzojimen anďelkocis.
