…štar minuti pal jepaš raťi, balvaj zorali, šil dandrel či ko kokala…
…bešav, thuvarďi andro muj cirdav, čhonoro labol andro jakhora…
…gindinav pal savoro, u sako raťi furt čak pal oda jekhoro…
…pal oda so mire čhavenca avela, sar savi bacht len arakhela…
…savo baro šukaripen si kana balorendar tumen chudav,
he vastorendar kikidav, kana tumen soven, mire pre tumare rakinav…
…oda ideos avka denašel u me som sako ďives phureder…
…devla, hine ajse ciknore, u andre luma savi dživen si varekana ajso bibachtaľipen…
…mukav televozoris, šunav nevipena u korkoro pestar phučav pre akala rosňipena,
the manušakero džungalipen…
…sas oda mišto kaj tumen anďom pre akadi luma,
numa ňiko čačo pal pale mange naphenela?
…darav pal lende bares u e asva mange čujol pofatar…
…no sako tosara kana khamoro pes sikavel, joj mange zoraľipen, the paťaviben,
pal pale andro jilo anel…
…paťaviben, kaj oda jekh si nek bareder pre akadi luma vaš mande kaj hi man mire
duj cikne čhavore…
…karačoňa nane ňiso bije lengere šukar jakhora…
…u te nek barder ňilaj oda taťipen kana peskero sikhavel hi bija lende čak asjo jevend
so o decembroskero jiv peha anel…
…manuš peha liďžel ajso baro kamipen…
…devleskero, džuvlakero, džal khatare tute ke daj the ko dadoro…
…numa ňisavo lendar nane bareder, u akada šunen tumen savore, sar kana kamel
o dat peskere čhavoren…
…čhaves, čhajora peskera, ňisavo nane pre akadi luma šukareder, si akada čačipen…
…jejkh ďiveseste miro deštos našlola pes andre jag, .pro prachos pes viasarela, e voďi žuži
šaj hoj andro zejgos sajinela, no šunen man mištes, mire čhavore
MAJKO, NELKA šunen man, paťan kaj miro jilo pre akadi luma ačhela, u leskero
bašaviben sako raťi kana the sovel tumen pes rakinena, andre peskere jile oda the miro
the giľavel tumen šunena, kana peskere jakhora zaphandena…
…kamav Tumen avke but zorales u te avke polovkores, me sem tumaro dadoro
san miro dživipen, san miro savoro…
Sako jekhfar, kana vareso kamav the irinel, kamav ola čačikane lava the rakinel,
savorenca pes šaj the phenel avri so mange ačhel pro jilo, so mange sajinel pre voďi,
ajse lava savenca namušines the irinel savoro,
čak ola eršejnore u sako ko oda genel džanel so kamľom the phenel.
Čak akor mange nakampel ňisave lavora, kana len chudav khatare lengere balora…
hi oda, vareso ajso pal soste nadžanes čačo the irinel the varesave lava the rakinel…
hi oda savoro garudo andro jilo, andre goďi, čačipen the phenav oda ideos ňi nagindines,
čak džanes kaj sal bachtalo the sal lenca.
Džanen sar savo hi oda kana avav andrale buťi raťaha u imar jojn soven andre sovľarďi
peskera dajaha, džav andre soba u le mobiloha mange sitinav, kaj lengere mujora the
dhikav u vastenca len the chudav u paj polokores džav, o vudar andre phandav kaj len
me opre the na ušťavav.
U kana me zasovav, o jakha mire zaphandav u mejk lengere jilora khelibnastar hi man…
