Blog

Soske o nipos korkoro pes andro binos rakinel, so jov peske gindinel,
kaj o na lačhipen les čak javke bije mel mukel?
Soske o nipos andro kaľipen nadhikel oda so pes pro kham našťi the dhikel,
abo korkoro pes bikinel u peskero muj joj našavel, les pro meripen nacirdel.
Soske o nipos baro solacharipen rakinel u kada baro lav či džanel the dochudel,
mušinen ola save rohajinen the užarel andre peskero voďakero dukhaviben.
Soske o nipos kores jileha pre peste dhikel,
u aver manuš paše tute či džanel kaj tu sar alatos džives-nadžives?
Soske o nipos pre bari dukh aver manušenge kerel barvaľipnastar lašaripen,
numa akada barvaľipen si tiri maribnaskeri čapata.
Soske o nipos dilino, rohajinel ezera manušen, soske na sikaven peskero čačikano muj
u e maska asabnaskerestar na odčhivel varekaj pestar dur.
Soske o nipos rakinel pes kepeste sar ko naprindžarel pes, soske nakamel the achaloľ
kaj kampel the šegitinel olenge save imar nabirinen čoripnastar pro agor.
Soske nipos savo buťi te prindžarel nakamel, imar bisterďa pro ideos kana tosarastar
či ke raťi buťatar na zaačhalas andre lakri mel pes zaučharelas?
Soske o nipos dilines pro bosaračaga paťal u lendar pes na mukel,
pro asaviben čak pes visarel. Kamel the sihavel peskere čačipena.
Soske o nipos sar alata pučinde peskere muja bengeske bikinde,
či naprindžaren imar odi dhuk, kana sar o pindro cikňa kamašľatar dhukal bud.
Soske o nipos na kamel the sikhavel peskeri čačikaňi pofaj,
feder leske the džanel kaj pes džala the vesekedinel, pro maripen, pre bari lač.
Soske o nipos ňiso nakerel pre peskero šegitipen, bokaha pes kamel the čajol?
Soske o nipos na kamel the poťinel vaš peskere diliňipena, kamel pes čak vaš varesave
rohajipena the garuvel, u odoj kaj les ňiko nadhikel,
odoj rovel, pro khoča perel u imatkozinel.
Soske na paťal korkoro peste, čačo perela andre kaľi chev jek ďives, odok kaj e raťi
khelel? Soske čak varekeci frima manuša andre kadi chev na peren, lidžen lengere
čanga len čačikano dromeha, na prindžaren kaľipen, andre savo nek bareder si
o meripen. Ke tu mende manuša gulore, saven nek zoraleder o dživipen marel,
ke tumende mire vušta lava rakinen, paťav kaj vareso, vaj vareko zejgoskera jagaha,
tumari dhug pro ťaťipen avri lačibnaha visarla.