Ando parne parti phirav, dikhibnaha,
ando vodi avel, šudripe te suno.
O dromoro ko kherora sar gredalo le jegoha,
Pal leste aven diľa karačuno.
Koloro te bibachtalo hi parnipe čerheniko.
Kamav man te garuvel teli parni duchna.
Mre aťha phare hi, kamen te zasovel.
Ande mro gavoro ma buter naroven.
Ando bala kale peľa mange čerheň,
phabol ande lende sar šel čerheňora.
Ov mange ačhiľa ande miro jilo,
kana avav khere palo duge droma.
Dukhaha me dikhav upreder pro nebo,
džanav hot me dikha odoj le amaren.
E burnik ikrav pri klučka heriko,
darav la te zjuminel, te o vudar te phravel.
E škorica, e vanilka, dakeri kuchiňa,
pali kafidi bešav, pre late gondolinav.
Karačno ideo hi mange avka pharo,
so sľan ando nebo, mange andro jilo.
Nek mange džal suno, pal mri familia,
pal e kafidy svecošni, sungipe karačutno,
asi šukar karačhon ando tikno gavoro,
gondolato pre tumende nalela mange o jego.
