Blog

Guľo Devloro, tu dhikes amare dhukade voďa, sam phagerde, markerde, rovkerde, lange,
tu dhikes amare rovkerde jilora, amare bi kokalakere deštora, amen savoren ňiko na
kamel, amen le Romen, našaden, save ačhiľam pre luma korkore.
Somnakuno Devloro, tu šunes amaro baro, dhukado rovipen, thaj vičiňiben savo imar
nane ajso zoralo. Kaj les the šunel tiro kanoro, šunes amaro hangos savo doresel khataro
do jekh khotor phuvakero.
Raje miro baro, tu amenge diňal dživipen andro savo našťol pes o themipen, čak phirkeras
upre-tele lumaha, sam khere odoj kaj o pindro pes arakhel phuvaha. Avka sar phurikane
slugaďa, urkerde andro trastune gada, the amen pes kamas vaš peskero šukar dživipen
the marel, dumo paš dumo the ačhel, numa na sam sar jekh murš, jekh avreste napaťas
u bilačhipen pre peste keras.
U vašoda tut pro khoča Devla mangav, kaj amaro romano nipos the arakhel peskero
romipen, the ačel pes Rom manušeske bija oda kaj the našavel pes o romipen, kaj the
ačhas pro čanga zorales sar jekh baro, goďaver chulaj, u the na zadanderas pes andre
mosarďi sar o Adam la Evaha lovli phabaj.
Mangav tut guľo Devloro, kaj amaro nipos romano, imar the na perel andro govno kalo,
našado, kamel jov čak šukare pre luma the dživel, the bešel, jertisar tu sentno amen.
Mangav vaš amaro romano nipos tut, čačo vaš lende, kaj šaj phundraven vudar
u navičinen, „Rom – murdar!“ Kaj lengere vuštenca the navakerel vareko aver, kaj lengere
lava jilestar the aven pal pale. Kaj pre amende ňiko the na čhungarel, či amen Devla čačo
na sam manuša, sam čak valata? Amare phure bini amen dochuden pro droma, nane
amen manušakere hakaja, sar brišindestar paňori som marel pes ciknoro le bare khameha,
akada tu kameha?
Mangav tut jilestar baro Devloro, kaj the nakerel bilačhipen pre amende o gadžo,
the leskero bešibnaskero, kaj pes the na ačhas trojsko grajoro,
the na avas sar dhukado andre jakh kaštoro.
Mangav tut baro Dadoro pro zejgocis, kaj imar the kathar amende o daravipen the oddžal,
de amen kamiben, smirom, lošaďipen andro famiľiji,
kaj the the do resel ke tute miro imatkozipen,
me paťav kaj th le romenge tu kames the kerel čercheňakero drom, pal savo jojn avena
jekh ďives ke tute savore…