Andre blaka ričoros ačhel
pre leste miri čhajori čak dikhel u o jilo bares kamel.
Dade, cineha mange les jekhfar?
Vakeres mange „jilestar tut kamav mri čhaj“.
So o dadoro bare kamibnastar prejkal čhajori jekh korkori joj nakerla?
Baro balikos pes phares lidžel, kaj pre phuv naperla,
bareder numa si mejk andre lakre jakhora lošaďipen,
u oda baripen savo pes pre ulica rakinla…
Mro šukaroro ričoro,
andre miri soba arakhela tiro deštos thanoro.
Manca čak raťenca sovkereha,
pašo miro šeroro, sunoro mireha tu deha.
Bud šukares khelel miro jilo vaš akada, miri Sara
jav lošali dugo ideos, čuče, džide berša.
Buteder čahvorenge o asaviben andro pofajora namarel,
ňiso lendar nane rosneder sar sal tu, u oda so tut hin, nane len.
Bud čhavore mušinen bari bibacht, čoripen the astarel
daranďipen, nasvaľipen, bokhaľipen, the trušalipen.
Raťenca jojn nasoven, ďivesenca rovkeren,
u šukariben andro dživipen khanči joj nadžanen.
Dade miro dadoro, man pal lende dhukal bares jiloro,
ňiko nane pre luma so kerela prejkal lende lačhiben?
Le ričoros, mire vasta lenge bičhaven,
kaj te lengere jakhora imar the kehelen.
Miro šukar ričoro, tu sal miro jiloro
užarel tut dugo drom,
numa vašoda kaj le čhavorenge čororenge baro lošaďipen the anes,
baro kamiben lenca the thoves.
