Blog

(vakeriben čhajoraha savi si korkori bije daj, dat, le phureder manušeha.
Akadi poetikaňi irinďom andro berš duj ezera the štar u si prejkal savore
čhavore saven nane pre akadi luma ňiko)
Le čhavoren phiravel o čangalo, the anďa joj amen,
phučav tutar akana me, ko phiravel le dajen?
oda si ča ajse čirikleskere mosaripena,
the mosarel vareso oda si bud čirikleskero,
Varekaj pes čačo vareso mosarďa,
ko the kerel kamel les pro pikerdoro?
Gindinav, kaj si oda nalačhiben, kaj o čangalo dajen na anel
Le čhavoren he, u le dajen na, phen kaskeri si kada briga?
Gindinav, kaj si oda nalačhiben, kaj o čangalo dajen na anel
Šaj bi pes ačhelas kaj ke tiro jiloro duj daja pes arakhenas.
Le čhavoren phiravel o čangalo, the anďa joj amen,
phučav tutar akana me, ko phiravel le dajen?
Avka savoro paj doperel,
kana o manuš kamel pro čirikle krisos the thovel,
o čangalo dajen na phiravel u akada si čak manušeskero phujiben.
Gindinav, kaj si oda nalačhiben, kaj o čangalo dajen na anel
Le čhavoren he, u le dajen na, phen kaskeri si kada briga?
Gindinav, kaj si oda nalačhiben, kaj o čangalo dajen na anel
Šaj bi pes ačhelas kaj ke tiro jiloro duj daja pes arakhenas.
O Vlado RAFAEL
kada terno manuš hino irutno publicistas.